كتاب قوة الأصفر:
رسالة وداع الى معشر الاصفر
تعرفون اني جداً مهتم بالفلسفة والافكار الحرة غير المفروضة ومحارب قوي لظاهرة التدميغ اللي نعيش بيها من كل الجهات
وخلصت عمري اقرأ عن هذه الافكار ونشأتها وتطورها وانتشارها. بس بصراحة ما كنت مهتم بالفكرة نفسها بقدر اهتمامي لحياة صاحبها الشخصية وهسه انطيكم مثال
سقراط فيلسوف يوناني قديم جدا وافكاره كانت الاساس بعلم الفلسفة والعالم كله معجب بحكمته بالحياة.. لكن الاهم عندي من هذا كله هو شلون عاش؟ لان اذا كان فيلسوف جيد وبحياته الشخصية يتبرأ من افكاره اللي يدافع عنها كفيلسوف ويناقضها بتصرفاته فهذا ما اشتريه بفلس حتى لو العالم كله يمجده.
لذلك بقيت اتعمق بحياة كل عالم اني معجب بي.. وواحد منهم سقراط.
اللي وره ما نجح ووصل صوته لسكان اثينا كلهم، اتفقوا عليه وذبوله تُهم ان هو ملحد ويحرض الشباب على الافعال المشينة وغيرها الى ان وگفوه گدام المحكمة.
سقراط ما چان عنده فلوس يخلي محامي وگف گدام اكثر من ٥٠٠ نائب وجمهور غفير من خيرة سكان اثينا والمحاكمة صارت گدام الكل
گالهم شنو تهمتي؟
گالوا انت تفسد الشباب
گالهم انتم قادة وسياسيين ومفكرين مادامكم دتصلحون الشباب فشنو تأثير شخص واحد امامكم؟ معقولة الشباب يسمعوني ويتأثرون ومن يسمعوكم ما يصلحون انفسهم؟
گالوا انت تلعب بعقولهم
گالهم هنا گاعدين معلمين ومدرسين ومربي الاجيال هل من المعقول هذا الكم الهائل منهم ما گدروا يصلحون الشباب اللي اني افسدتهم؟
گالوا انت كافر وملحد وتستحق الموت
گالهم اوكي خلي نفرض اني كافر زين الله عز وجل مو فاتح التوبة لعباده يصير تقتلوني واكو احتمال اني اتوب الى الله وانصلح؟
گالوا انت ما تتوب ولا تنصلح
گالهم اني مو ملحد حتى اتوب بس اذا تشوفوني كافر اني هنا گدام الكل اعلن توبتي واؤمن بالله فهل يجوز قتل نفس مؤمنة؟
بقوا ساكتين ما گدروله بس لانهم يريدون بي شر حكموا عليه بالاعدام
بقى بالسجن حتى موعد تنفيذ الحكم واجاه واحد من طلابه گاله احنه دبرنالك طريقة آمنة للهروب تعال افلت بريشك
گالهم منو ينهزم اني؟
زين الناس شراح يگولون عليّ؟ كل هذا التفلسف والمواعظ والحكم واخر شي اشرد من الموت؟
گاله الطالب يابه هسه دعوف الفلسفة احنه بيا حال راح يعدموك خلّص روحك.
سقراط گال اذا انهزم يعني كل جهدي وافكاري والعلم اللي قدمته يفقد قيمته ومحد يگوم يحترمني ويصدگ بكلامي
وفعلا بقى بالسجن الى ان عدموه بالسم ومات.
ومن يومها وسقراط معروف بشهيد الكلمة والحق لان ما تنازل عن مبادئه لاخر لحظة وان كان الثمن روحه!!!
العبرة وين؟
اني دخلت لهذا العالم واني عندي مبادىء ما حدت عنها بيوم ابد، لا مسيت عرض لا جبت طاري شرف لا نشرت فضايح لا عرّيت المستور.. والاهم، ما وگفت بجانب الظلم على الرغم من كلشي.
بقيت الى اخر رمق مجهول لان وعدتكم ببداية المشوار ان مراح استفاد شخصياً من شهرة ابو الاصفر اللي انتم حبيتوه بغموضه وسوالفه.
وواصلت وياكم ٥ سنين متتالية واني امشي بحيل صدر ما خايف لا من حكومة ولا من قانون ولا منكم ولا من فضيحة لان اعرف بنفسي ماشي عدل كل هذه الجهات ما تگدر تديني بشي. والاهم منهم كلهم، اني مطمأن ان رب العالمين چان واكف ويايه لان هو اعلم بذات الصدور ولهذا محد گدرلي مهما حاولوا.
ليش دا احچيلكم هذا الحچي وشنو علاقة سقراط بالموضوع؟
لان ياجماعة الخير وصلت لمرحلة لو اخضع واتنازل عن مبادئي واستلم فلوس واطمطم لفلان وعلان لو اشرب السم مثل سقراط واموت بكرامتي وبرسالتي الحلوة اللي محد گدر يلوثها رغم كل المحاولات!
ولان الدنيا فانية، والرسالة الفكرية اقوى واكبر من كل المغريات، ولان الفلوس وسخ دنيا والاهم، ان الحق لا يُعلى عليه.. قررت اترككم واني بقمة وفائي للمبادىء اللي خليتها من اول يوم وبقمة اخلاصي لكل واحد دافع عني بتعليق او بحرف.. اترككم واني فخور جداً بنفسي لان دخلت عالم قذر جداً وما اتوسخت بي. دخلت بنص الوحل وطلعت ابيض مثل الحليب لان انتم رفعتوني على اكتاف الراحة ما خليتوني اغلط ولا اچفص وكنتم بمثابة الرقيب والحسيب اللي اخاف منه واعول عليه بنفس الوقت.
اني بهذه الرسالة اعلن برائتي من كل حساب يحمل اسمي.. ابو الاصفر وان راح.. افكاره ومبادئه ورسالته موجودة بداخل كل شخص بيكم. لذلك ما يحتاج حساب حقيقي او مزور.. موثق او مزيف.. لان هو فكرة والفكرة لا تموت.
شكراً على اوقات حلوة عشناها سوية، يمكن انتم تنسوني، بس اني مستحيل انسى اي تفصيلة عشناها، لانكم رقم فارق بحياتي.
اني بخير جداً.. واني بمكان آمن جداً.. ودا اكتب هذه الرسالة واعيش مشاعر مزدوجة. من ناحية اشعر ان حمل كبير انزاح مني لاني تبنيت مهمة صعبة جداً مو اي واحد يتحملها
ومن ناحية ثانية اشعر بالحزن لان راح افتقدكم وافتقد ابو الاصفر وياكم
بس على الصعيد الشخصي لازم نبدي حياة جديدة. واذا تحبوني لا تمانعون هذا القرار واتمنولي الخير مثل ما اتمناه الكم. وادعولي كلما تتذكروني.
احب اشكر الجنود المجهولين واحد واحد..
والمصادر كلها.. وكل شخص ساعدني وكل شخص رفع من معنوياتي ولو بكلمة وحدة.
عن نفسي بحياتي ما انساكم، بس اني طول هالخمس سنين واني ممرتاح اشعر نفسي بمكان مو مكاني، وعالم مو عالمي. بالنهار اتعمق بأفكار علمية ومحاورات فكرية وبالليل اخليلكم فيديو نطير فوگ الغيم واحچي على المقامق والنقانق.. عشت حياة مو حياتي وتحاورت ويه ناس مو من عالمي. كل هذا في سبيل اوصل رسالة تفهمها كل الطبقات. ووصلت لغايتي وهدفي حتى اكثر مما اني رايد ومتوقع.
وكنت اعرف هالمشوار مؤقت لان مراح اگدر اتحمل اكثر.. بس اريدكم ترتاحون من شغلة.. اني عالمي الحقيقي مختلف تماما، مابي اذية، ولا صراعات ولا صدامات، عالمي هادىء وفريد وراقي مابي هاي الحثالات اللي انشغلت بيها طول هالسنين.
هذا القراري مو آني.. هذا قرار اتخذته شهر التاسع عام ٢٠٢٢. وهو الشهر اللي كتبت بي الكتاب لان گلت لازم من اروح اعوفلهم ذكرى حلوة مني تتذكروني بيها وتكون موجودة ببيتكم.
واذا اكو بيكم ناس متحبني وتكرهني فتأكدوا راح يجي يوم وتگولون هسه عرفنا ابو الاصفر ليش يحارب هذه الافكار وهاي الناس!
معشر الخير، والحب، والذكريات… شكراً لوجودكم بحياتي تعلمت منكم هواية وكنتم خير سند وخير داعم.
كونوا بخير وكرامة وعزوة
كونوا بعقل واعي وفكر ناضج
صديقكم ابو الاصفر
اتمنى من معشر الخير يعمم هاي الرسالة بكل حساباتكم والكروبات لان اريد الكل يعرف نهاية المشوار حتى محد يصدگ بالبيجات الموجودة حاليا اللي تحمل اسمي لان راح يحاولون قدر الامكان يشوهون سمعتي بيها
اتمنى منكم هاي الخدمة الاخيرة 🙏
للمرة الاخيرة.. اي حساب موجود حاليا بإسم ابو الاصفر بالانستاگرام والفيس والتلي (باستثناء هذه القناة) غير تابع الي
وراح انزل الكم محادثات فيديو من الشخص اللي سوه حسابات بأسمي، وگاعد يوثق بيها وحدة وحدة.. وراح ينطيها لناس يديروها ويستمرون بيها
بالبداية اجوي ساوموني حتى ارجع بمشوار ابو الاصفر عن طريق حساباتهم هم!؟ بس لا ازال اني ابو الاصفر اللي مفتح باللبن وما يغلط هيج غلط.
شوفوا شلون يكتبلي بالرسائل انت اعتزلت ورحت خلينا احنه نكمل ونسترزق بإسمك!؟ بدون موافقتي وبدون رضاي؟ يعني يغشوكم عيني عينك!؟
اني هالشي ما اقبل بي واكو غير جهات ديراسلوني من البارحة لليوم حتى ابيع الهم علامة ابو الاصفر وانزل الكم اني موجود بفلان مكان وهم يكملون بمكاني
بس والله لو على گص رگبتي ما اسويها
لان المعشر مو للبيع!!!
اني وياكم سوينا مشوار حلو والنهاية كانت احلى لان هو من البداية مشوار مؤقت اكيد مراح اكرس حياتي انتقد هذوله الفشلة.
لذلك ابتداءً من هاي اللحظة ماعندي اي حساب ومراح ارجع بقراري واذا رجعت انتم راح تعرفون
اني راح ابقى اتواصل وياكم بين فترة وفترة بهاي القناة واذا طارت اكمل بالتطبيق مالتي بس حتى اسأل عنكم واطمنكم عني.
شكراً لان نشرتوا بكل الكروبات لان هالشي خرب عليهم شغلهم
شكرا للمرة المليون لان مخذلتوني ولا مرة 🙏
هذه رسالة ابو الاصفر الاخيرة للمعشر ان شاء الله تستوعبونها وتكونون على قدر المسؤوليه وما تنجرون خلف المخططات الجاية لاستغلال اسم ابو الاصفر
