آهٍ ويا لها من رحلة .. هِدَتني هواي هوااي اشياء ضمآنة لمعرفتها ، چنت دائماً رغم انفتاحي الفكري ومرونتي الذهنية احس اكو اشياء ناقصتني، اسئلة ما الگالهة جواب، حلقات مفقودة! بس اليوم ومن خلصت الكتاب تيقنت انو اللي چنت ادور علية من سنين لگيتة اليوم ولگيت اجوبة للاسئلة اللي براسي تقريباً اكثر شي أثّر بية هو الفصل السادس (انجُ بنفسك) وهو هذا الجزء اللي چنت كل ما اقرة كم صفحة اتوقف واصفن بيهن وارجع اقراهة واتمعن اكثر ، ورغم چنت قادرة اخلص الكتاب بيوم واحد بس فضّلت اشتري ويا كتاب آخر حتى لا اصب كل شغفي بكتاب (قوة الأصفر) ما ردت تنتهي هاي المتعة بسرعة وردت اعيش شعور انو اگعد الصبح واگول اليوم شراح اكتشف وشراح يعلمني ابو الاصفر؟
اذا چان اللي سائل هذا السؤال (هل تجرؤ على تدوين ما عرفته عني..؟) هي كاتبة شخصية ابو الأصفر ف من بين الأشياء العرفتها وترسخت بذاكرتي انو انتِ تحبين الأخضر وصفوري يحب الأصفر يعني معرفت إلّا القليل ، بينما كلّي معرفة عن اللي قدمتي ألا وهو (ابو الاصفر) وعرفت وشهدت التغيير والانتقالة اللي احدثتيها بمجتمع كامل وبعقولنة كلنة . وأعنيها من اگول انو كل كلمات الشكر قليلة بحقچ. جلّ ما يمكنني تقديمه هو دعوة في ظهر الغيب
وبالنسبة لأكثر شي حبيتة بأبو الاصفر انو هو مو حقيقي، وحبيت هالشي لأن چنت متوقعتة 🥹😂؛ قبل كم يوم كتبت بتعليق «.. بالنهاية ابو الاصفر فكر اكثر من كونة شخص» ومن عرفتة لليوم ما فكرت بشخصة و إنّما صبيت كل اهتمامي على عطائة الدَسِم وثقافتة وافكارة ونقدة لذلك ما صدمني شي ولا حتى حقيقة كونة شخصية خُطّت على سطور چان عبارة عن مجموعة من الافكار القَيّمة اللي مَدّت جذورهة بعقل كل واحد من المعشر وگلتها قبل "احنة اليوم كلنة بداخلنة ابو اصفر"
ولو حچيت هواي بس حابة اضيف هالجزئية واعبّر عن فخري كوني نفر من المعشر والكتاب اثمن شي حصلتة ولا راح يجي احصل مثلة ومن يصير عندي اطفال حعرّفهم من خلالة على بطل رواية (ابو الاصفر) واگلهم ماما كانت جزء من معشر اكثر شخصية مؤثرة بعصرها وافضل ناقد عرفة تاريخ السوشل ميديا أبو الأصفر 💛.

#قوة_الاصفر #ابو_الاصفر #صفوري #معشر_الاصفر